Naschientscha da Maria, purschala e mumma da Diu.
pdf: cheu l’entira historia
Ils 8 da settember: Naschientscha da Maria, purschala e mumma da Diu
Sco oz ha sontga Onna parturiu la pli biala, amureivla e sontga feglia Maria ch’ei daventada la mumma dil divin Fegl da Diu. E buca senza raschun conta e selegra la Baselgia oz. Igl aunghel Gabriel ha detg a Zaccarias che biars vegnien a selegrar dalla naschientscha da siu fegl sogn Gion Battesta. Ton pli duei igl entir mund selegrar e giubilar dalla naschientscha dalla benedida purschala Maria. Avon fuva il mund stgirentaus en cuolpa. Mo ussa cun la vegnida da Maria, ha tut il mund cun raschun astgau selegrar. Buca meins ha il tschiel cun l’entira Sontgissima Trinitad selegrau dalla naschientscha da questa nobla purschala Maria: Il sogn Bab per esser naschida sia cara spusa, il sogn Fegl perquei ch’ella veva dad esser sia mumma ed il sogn Spért, pertgei ella fuva dad el il tempel misterius. E co ein ils aunghels dil parvis selegrai, vesend che lur Regina e Signura seigi naschida. E tgi sa declarar il legherment dils patriarcs, dils profets sin la vegnida da questa flur? Buca mo tschiel e tiara ein selegrai, mobein era ils geniturs sogn Giohen e sontga Onna che fuvan vivi biars onns senza survegnir affons. Denton, tgi ein els stai, sogn Giohen e sontga Onna, als quals Diu ha vuliu far tala grazia? Sogn Giohen fuva nativs da Nazaret e sontga Onna da Betlehem. Els vivevan ina sontga lètg cun gronda tema da Diu, tenevan perfetgamein la lescha divina, uravan, giginavan e fagevan almosnas. Diu ha entuorn 20 onns dau ad els negins affons. In aunghel ei lu cumparius ad els e revelau ch’els hagien da survegnir ina feglia e quella dueien els numnar Maria ed ella vegni a daventar la mumma dil Messias, Salvader dil mund. Da quella nova fetg consolai, han els grondamein engraziau a Diu. Sils 8 da december ha sontga Onna concepiu la sontgissima feglia e suenter ils nov meins, ils 8 da settember parturiu quei affon el marcau da Nazaret. Tut las creatiras ch’enconuschan Diu per lur Scaffider, enconuschan era Maria per mumma da Diu. Questa benedida feglia fuva la pli biala e la pli graziusa da tuttas creatiras. Pertuccond l’olma fuva ella schi alva, schubra, perfetga ed ornada cun grazias, duns e vertids che Serafins e Cherubims restavan smarvigliai enten mirar sin quella nobla creatira. Maria ei purschala e mumma sur tut las autras creatiras. Pertgei ch’ella ei mumma da Diu, mumma dalla grazia, mumma dalla glisch, mumma dil nies salit, dil nies spindrament e da nossa perpetna beadientscha. Cura ch’ina regina vegn per l’emprema ga enten il reginavel, vegn quella retscharta cun tuttas enzennas da legria, da reverenza e da honur. Con pli duein nus cun tut legherment, devoziun e honur retscheiver oz nossa Regina, nossa Signura e mumma ch’ei suenter Diu nossa speronza, pasch e nies refugi. Seigies beinvegnida, o purschala sontgissima! Gests e pucconts dueien selegrar cun la sontga Baselgia, pertgei oz ei naschida la mumma da Diu, la mumma dalla grazia, dalla misericordia.